Halaxe dio igorri duten mezuak:
Baztango
gazte koadrila batek Lekarozko kanpuseko “hizkuntza murgiltze zentroa” delakoa
okupatu dugu. Guk paraje honetako izen zaharra berreskuratu eta Abeltegia
deituko diogu, eraikin hau eraiki aitzinetik, hala baizen, monasterio zaharreko
abeltegia.
Gazteek
Baztanen etxebizitza duina eskuratzeko dugun arazoek eragin dute eremu honi
gure izaera propioz arnasa emateko nahia eta konbentzimendua. Horrela, bizitza
emanen diogu sos nahikeriak sekula sortzen utzi ez dion leku honi. Gure
soldata prekarioek eta diru ahalmenak alde batetik eta etxebizitzen errenta
tasek bertze aldetik ez dute Baztango gazteriaren zati handi baten
errealitatearekin bat egiten.
Orain
Nafarroako Gobernuko egoitza den hau aukeratu dugu urteak daramazkielako
hutsik. Guk arnas emate honen bitartez, etxebizitza eskubidea aldarrikatzeaz
gain, nafarrek pairatzen duten prekarietatearen aitzinean horrelako azpiegitura
duen eraikin bat hutsik egotea lotsagarria dela salatu nahi dugu. 3000m2
egoitza, bulego eta ikasgelekin eta 46 logela baino gehiago ... egunkari batzuk
argitaratu izan dutenez, orain guti arte bederen 5.4 milioi euroren truke egon
da salmentan!
Honez
gain, espazio honen ateak lotsarik gabe edekiko ditugula adierazi nahi dugu,
herritar guztiendako, hortaz ondoko hilabeteetan eskaintza sozial eta kultural
zabala prestatzen ahaleginduko gara. Jende guztiari gonbita luzatzen diogu
hemendik, antolatuko ditugun ekimen, ikastaro eta afera guztietara.
Nafarroako
Gobernuak bere garaian nafarren sosarekin egindako inbertsio astoarekin gelditu
den etxe huts honi bizitza ematera etorri gara. Bertzela
ere egun hauetan hurbildu lasai lekua eta gu ezagutzerat, nahi ezkero
proposamenak egiterat. Lekarozko Abeltegiko ateak edekiak baitira denek
ordaindu dugun heinean.