AROZTEGIAKO PSISa LEGEZ GELDITZEN AHAL DA BI URTE PASA DIRELAKOZ. GELDITZEA ESKATU DUTE BATZAR NAGUSIKO ZENBAIT KIDEK

Data:
Nafarroako Gobernuak Lekarozko Aroztegiako udalerriz gaindiko eragina duen plana (EGEP edo PSIS) onartu zuenetik bi urte pasatu dira eta lanak ez dira hasi.

Horregatik, legeak ematen duen aukera baliatuz ekainaren 6an Nafarroako Gobernuko presidenteari eta Landa Garapen, Ingurumen eta Toki Administrazioko kontseilariari Baztango Batzar Nagusiko lehendakariaren izenean eskari bana igorri nien, Aroztegiako PSIS gelditzeko eta honen inguruko erabakia Baztanerat ekartzeko eskatuz.

Aroztegiko PSIS baztandarren gainetik egin nahi den proiektua da eta bailaran alimaleko eztabaida piztu du. Haatik, Nafarroako Gobernuak bailarako eztabaidari aterabide demokratikoa eman beharrean berean tematu eta baztandarren gainetik pasatu nahi izan du. Eta, argi eta garbi erran behar da, proiektu partikular bat egiteko, pelotazo bat bururatzeko, inongo interes orokorrik ez duena.

PSIS hau Baztango erakundeei buruzko eraso handia izan da. Hirigintzako eskumenak Baztango Udalarenak direlako eta herrilurrenak Batzar Nagusiarenak. PSIS honek funtsean tokiko erakundeen autonomiaren eta izateko arrazoiaren kontra jotzea erran nahi du eta, hori, ustez aldaketa defendatzen duen Gobernuak egitea eskandalagarria da. Horregatik, gauza guztien gainetik eskari honekin Baztango erakundeen autonomiaren eta eskumenen defentsa egin nahi dugu. Gehiago, herritarren geroan eragin handia izanen duten proiektuei buruz herritarrek zuzenean erabakitzeko eskubidea ere aldarrikatu nahi dugu.

Kontuan hartu behar da, gainera, 2009an Nafarroako Gobernuak Aroztegiako proiektua PSIS bezala tramitatzeko enpresaren eskariari EZ erran ziola eta udaletxearen aitzinean udal planaren aldaketaren bidez tramitatu behar zela jakinarazi ziola. Alta 2015ean, 2009ko erabakiari kontra eginez, UPNek PSIS bezala tramitatzea onartu zuen eta urte bereko abenduan Geroa Bairen gobernuak berretsi. 2009koari buruz zer aldatu da? Tartean zer egon da?

Aroztegiako proiektu honek bailaran alimaleko kezka eta gatazka piztu du. 2009an Lekarozen herri galdeketa egin zen eta gehiengoak proiektuaren aurkako iritzia eman zuen. Geroztik 2016an Elizondoko karriketan 1500 lagunek baztandarrei hitza emateko eskatuz manifestaldia egin zuten eta urte bereko ekainan Batzar Nagusiak deiturik bailara mailako herri-galdeketa egin zen, zeinean %80ak baino gehiagok kontrako iritzia eman baitzuen. Denbora honetan Lekarozko herria proiektuaren aurka behin eta berriz agertu da eta Batzar Nagusia ere bai. Lekarozko herriko alkatea hautatzeko azkeneko aukeraketan ere, proiektuaren kontrakoa aise nagusitu da.

Proiektu hau PSIS bezala tramitatzea zerk justifikatzen du? Deusek. Herritarren kontrako iritzia saihesteko jokaldia bertzerik ez da.

Gobernu desberdinek Aroztegiako proiektuaren alde agertzeko proiektuaren garrantzi estrategikoa aipatu izan dute, baina gaurgero hamar urte pasatu dira eta ez dute fitsik aitzinatu. PSIS onartu zenetik bi urte joan dira eta lanak ez dira hasi. Proiektuak izaera estrategikoa omen du baina inork ez ditu Lekarozen egin nahi dituzten 228 etxebitzitzak faltan botatzen. Baina, hori bai, inorat ez doan proiektu hau egiteko Baztango erakundeei ostiko eman diete eta herritarrei erabakitzeko eskubidea kendu.

Geroa Bairen gobernuak urrezko aukera du Aroztegiako gatazkari aterabide demokratikoa emateko, tokiko erakundeen autonomia aitortzeko eta gobernatzeko bertze modua erakusteko. Aukera paregabea du berrazterketa honetan kalteordainik jokoan ez dagoelako eta aukera paregabea du gobernuak erran duelako orain artio PSISekin eman den aldrebeskeria zuzentzeko lege berria egin nahi duela iragarri eta Aroztegiakoa hor sartzen ahal duelako.

Horregatik, Nafarroako Gobernuari burutsu eta adimentsu jokatzeko eskatzen diogu eta ekainaren 6an erregistratu genuen eskariari arrazoimenez eta zentzuz erantzutea.

Aroztegiako PSIS gelditu. Baztango aferak baztandarrek erabaki ditzatela.