prentsa ohar baten bidez
Halaxe dio oharrak hitzez hitz:
Anitzetan erran ohi da indarkeria
patriarkalak milaka aurpegi eta milaka boz dituela, baina oraingoan ate
gibelean altxaturik pasatu eta pasatu ohi diren biolentzia-egoeren inguruan
arituko gara: haurren kontrako indarkeria patriarkalaz.
Haurren kontrako bortizkeria
patriarkalak baditu dimentsio anitz: eraso fisikoak, psikologikoak,
sexu-abusuak,… Indarkeria aldaera desberdin horiek estuki lotuta daude
patriarkatuaren baitako jendarteratze-prozesuei.
Jendarte honetan boterearen
hegemonia heldua, gizona eta heterosexuala da. Hori dela eta, hori mantentzeko
tresnarik nagusiena bortxa izanen da. Horrenbertzez, indarkeria hori sufritzen
dutenak jendartean zaurgarritasun-egoeran bizi diren era anitzetako subjektuak
izanen dira: emaztekiak eta haurrak bereziki.
Indarkeria sexistak duen dimentsio
zabal honen gotorlekua patriarkatuaren oinarria den familia nuklearra da.
Horren oinarriak hauek izanik: heterosexuala; maskulinitatearen plazerera eta
bizitzara egina. Familia-eredu hori eta horren gertuko sarea bera dira
errealitate lazgarri horien isilpeko babesleku; hortik: trapu zikinak etxean
garbituko ditugu.
Salatzen diren sexu-abusuak
kontuan hartuta, hamazazpi urtetik beheitiko lau nesketatik batek jasan ditu
noizbait bere bizitzan, eta zazpi mutiletik batek. Sexu-abusua jasan duten
haurrek gehienetan bere erasotzailea ezagutzen dute: %70etan hurbileko senidea
da. Haurraren hitza ez da kontuan
hartzen, ez zaio sinesten. Salaketa gehienak ez dira epaitegietara ailegatzen,
eta ailegatzen diren horiek,
gehienak artxibatu egiten
baitira.
Ezin atzendu genitzake haurrek
euren amaren kontrako indarkeriaren ondorioak pairatzen dituztela zuzenean,
nahiz eta legeak horrela ez jaso. Epaitegietara ailegatzen diren
banatze-kasuetan, zaintza partekatuaren legea onartuz geroztik, ikusten ahal da
indarkeria sexista egoerak izan diren bikoteen kasuan, adibidez, ez direla
kontuan hartzen, eta erasotzaileei bisita-erregimena mantentzen zaiela kasu
gehienetan.
Ikusi makusi, zer
ikusten da? Erpin
anitz dituen poliedroa egoera gordin eta lazgarriez gainezka dagoela. Horren
aitzinean, beharrezkoa da gatazka honi irtenbideak ematen hastea. Horretarako,
hasteko, egoera horietan sortzen diren isiltasun-hitzarmenak hausten hastea
garrantzitsua da. Sufrimenduz betetako bizi-hastapena izan duten subjektu
zaurgarriak ikusgarri egin behar ditugu; jendarte-heldu gisa dugun arduraren
jabe izan behar dugu; horiei aitzin egiteko epaitegietako paper zimelduei bide
ematea exijitzen diegu agintari politiko eta judizialei; ttipitatik neskekin
autodefentsa feminista lantzearen beharrizana mahai-gaineratzen dugu eta
indarkeria egoera anitzetatik askatzeko, nahitaezkoa izanen dugu hezkuntza
eredu hezkidetzaile eta feminista baten aldeko
jardunarekin jarraitzea.
Erasorik ez, erantzunik gabe!
Karrikan izanen gara aurtengoan
ere!
EUSKAL HERRIKO
BILGUNE FEMINISTA
2016ko azaroan