Prentsa ohar batean halaxe adierazi du:
Nafarroako
Gobernuak eta Aroztegiako sustatzaileek herritarrei hitza ez emateko egindako
eginahal guztien aitzinean, igandeko galdeketa Baztango erakundeen eta
herritarren lorpen handia da. Hortaz, Batzar Nagusiak galdeketa egin ahal
izateak eta hala nahi izan zuten herritar guztiek parte hartzeak sekulako balio
politikoa du.
Gobernuko
adierazpen harroei, Geroa Baiko eta UPNeko talde parlamentarioetako erran zabar
eta probokatzaileei buruz, komeni da mespretxuz mozorrotutako beren
autoritarismoa salatzea eta herri galdeketa hau bere testuinguruan baloratzea.
Normalena, guttieneko kultura demokratikoa dagoen tokietan, herritarrei
beraiengan eragin handia izanen duten proiektuez aitzinetik galdegitea da. Kasu
honetan, enpresa sustatzaileak eta Nafarroako Gobernuak PSIS onartu aitzinetik
ez zuten halakorik egin. Aldaketakoa omen den Geroa Bairen Gobernuak ukatu die Lekaroz
eta Baztango herritarrei parte hartzeko aukera, UPNk bezal bezalaxe.
Horren
aitzinean Baztandarrek eta Batzar Nagusiak herritarren erabaki ahalmena
aldarrikatzeko herri-galdeketa ez erreferendarioa eta ez loteslea egin behar
izan dute bailaran lehendabiziko aldiz. Baldintza horietan eta gobernuko
ordezkari desberdinek PSIS onartua dagoela, gibelarat bueltarik ez dagoela eta
balizko galdeketa legez kanpokoa litzakeela behin eta berriz erranagatik,
igandean baztandarren hirutik batek bere iritzia libre eta burujabeki adierazi
zuen. Eta gehiengo handiak, proiektuaren kontrako bozka eman zuen. Hori ikusi
nahi ez duen ordezkari politikoak bere bulegoko paretetatik haratago ikusten ez
duen burokrata elitista da.
Horiek
erranik, galdeketa hau parte hartze kultura errotua duten Europako kasuekin
konparatu behar da eta ez Geroa Bai eta UPNren adierazpenek agerian uzten duten
ikuspegi kazikil murritzarekin. Suitzan, adibidez, non galdeketa mota
desberdinak aldiro egiten diren (20-30 urtean), parte hartzea gaiaren arabera
%30-50 artekoa izaten da. Italian, bertzalde, azkeneko erreferendumean %31ak
parte hartu zuen. Eta Baztanen, izandako azken erreferendumean (Europar
Konstituzioaren ingurukoa, 2005ean), biztanleen %32k parte hartu zuen, eta
inork ez zuen ezbaian jarri. Baztanen
igandean lortutako parte-hartze maila europar maila honetan kokatzen da - %28
bailara osoan, %43 Lekarozen eta berdintsu antzeko proiektu urbanistikoak jasan
dituzten herrietan (%42,9 Amaiurren eta %40,7 Erratzun): hori mespretxatzen
dutenek datu konparatibo hauek izkutatzen dituzte, ezjakintasunez edota nahita ahaztuz.
Laburbilduz, kontuan izanda gurean herri
galdeketak egiteko ohiturarik ez dagoela eta Nafarroako Gobernuak zein enpresa
sustatzaileak galdeketa trabatzen saiatu direla, aski kontuan hartzeko parte
hartzea izan zen igandekoa, eta kontuan hartzekoa ere kontra bozkatu zutenen
kopuru handia. Agerian gelditu da PSISa tramitatzeko egindako parte-hartze
prozesua iruzurra izan zela eta egiazko afektatuei ez zitzaiela galdetu.
Ondorioz,
Baztango EH Bilduren iritziz, agerikoa da aukera ematen bazaie, baztandarrek beraiei
eragiten dieten gaien inguruan erabaki nahi dutela, parte hartzerako kontrako
testuinguruan bada ere. Horregatik, argi
izan behar da Baztanen egindako lehen herri galdeketa hau ez dela deusen
akabera, Geroa Baik eta Nafarroako Gobernuak nahiko luketen bezala, baizik eta
epe berri baten hasmenta. Herriak ukazioaren aitzinean bere ahotsa
adierazteko baliabideak bilatu eta burujabeki martxan jartzearen epea, hain
zuzen. Debekuak debeku, inposizioak inposizio, koakzioak koakzio, Baztango herritarrek
Nafarroako Gobernuak entzun ditzan lanean segituko dute.
Azkenik, Baztango EH Bildutik Nafarroako
Gobernuari bertze gai batzuetan horrenbertze aipatzen duen parte hartzea
Baztanen ere aintzat hartu eta errespeta dezala exijitzen diogu. Erakuts dezala
benetako aldaketaren gobernua dela eta ez UPNren jarraitzaile deskafeinatua.
Gure partez, beti prest egonen gara herritarrei entzuteko eta Aroztegiako
auziari aterabide demokratiko bat bilatzeko.