 |
Baztan ikerketagai duten ikasketa akaberako lan eta proiektuak
diruz laguntzeko ekitaldia aurkeztu zuen atzo Baztango Udalak: Gazteak beren ikasketekin Baztanen alde inplikatzeko
eginahala da. Baztango garapen sozial, ekonomiko eta kulturalari buruzko
begirada berriak eta haize freskoa behar ditugu eta, horretan, baztandar
gazteek zer egin handia dute. Etorkizuna
beren eskutik heldu da eta, horretarako, udalak ere eskua eskaini behar
dielakoan gaude.
Nafarroan aitzindaria den deialdia urtero errepikatzeko asmoa dutela azaldu zuen Joseba Otondo alkateak. Hiru proiektu aurkeztu ziren, eta denek guttieneko kalitatea zutela
ikusita, hiruei laguntza bana ematea erabaki zuten, hiruen artean landa-eremuari buruzko begirada konplexua eta anitza eraikitzeko lagungarriak:
- Alaitz Arretxea, Enpresen administzrazio eta zuzendaritzako ikaslea NUPen. Aukeratutako gaia: Turismoaren eragina piriniotako haran baten ekonomian: Baztan
- Oihana Otxandorena, Antropologiako ikaslea EHUn. Aukeratutako gaia: Tradizioa eta generoa: Baztango mutildantzak.
- Josune Berho, Artearen Historiako ikaslea EHUn. Aukeratutako gaia: XVII.-XVIII. Mendeetako Baztango goi-mailako etxebizitza tipologia
Lanak akitu ondoan, udalaren laguntzarekin norberaren herrian aurkezpen solasaldiak eginen dira.
Joseba Otondok azaldu zuenez, urtero deialdi hau eginez gure burua
ezagutzeko gero eta aukera handiagoa emanen digu eta Baztani buruz
interesgarriak izan daitezkeen proiektuak garatzeko aukera ere bai. Bertzalde,
baztandar ikasleendako beren herria arretagune akademiko bezala ezartzen
lagunduko du eta herriari buruzko konpromisoa modu batean edo bertzean
elikatzeko balioko du. Baztan
herri dinamikoa da , aldiro aldatzen ari dena, arazo eta erronka desberdinak
dituena. Prozesu dinamiko horiek ulertzen laguntzeko, arazoak erronka izateko
eta, azken batean, Baztan denen artean hobetzeko, deialdi hau interesgarria
izanen delakoan gaude.