Berriki 6 baztandarrek batzartze hutsagatik jaso duten 5.400 euroko isunekin poliziak egiten duen jazarpena salatu du. Halaxe adierazi dute hitzez-hitz:
Baztango Ezker Abertzaleak sei baztandarrek
ekainaren akaberan jasotako 1.200 eta 600 euroko isunen berri eman nahi du (5.400
€ denera) eta, bidenabar, isun hauek eta herritarrek jasaten duten errepresio
ekonomikoa salatu.
Isunak Guardia Zibilak jarri ditu joan den irailan
Herriraren kontrako operazioari buruz Elizondoko plazan egin zen batzarre
informatiboarengatik. Bere garaian Herriraren kontrako polizia-operazio horrek
Euskal Herriko eragile desberdinen eta herritarren erabateko gaitzespena izan
zuen. Alta, operazioa herri honetan bizi dugun salbuespen egoeraren erakuslea
izan zen eta sei baztandarrek jasotako isuna ere, horrela ulertu behar da.
Espainiako estatua bere tresnategi errepresibo
guztia mantententzeaz gain, inboluzio demokratiko argian dago. Hala, aldikako
sarekadekin eta epaiketa politikoekin, errepresio forma zuriagoak eta
ixilekoagoak erabiltzen jarraitzen du; eta gure salaketaren kausa diren isun
ekonomikoak horren adibide dira. Isun hauen helburua disidentzia politikoa
mutuaraztea da, herritarrak ekonomikoki mugaraino estutzea eta edozein herri-erantzun
desaktibatzea. Gainera, krisi ekonomiko garai hauetan, isun ekonomikoek herritarrek eta langile
klaseak bizi duten egoera larria handitzen dute.
Bertzalde bereziki azpimarratzekoa eta salatzekoa
da isun hauek batzarre informatibo batengatik izan direla. Orain artio
jakinarazi gabeko elkarretaratzeengatik horrelakoak ezagutuak genituen. Baina
ez informazioa ematea helburu zuten batzarreengatik. Ezbairik gabe, errepresioa
koxka bat gorago eraman nahi dute. Batzartzeko, adierazteko, informazioa
emateko eskubidea ukatu eta jazartzen duen estatua da Espainiakoa. Estatu ez
demokratikoa.
Gauzak horrela, momentu honetan aipatu isun
ekonomikoak errekurriturik daude. Nolanahi ere, aurtengo udan baztandarrek
jasaten dugun errepresio zuri hori salatzeko dinamikak eginen ditugu. Herritarren
artean elkartasuna sustatu, arazoaren kontzientzia hartu eta herri erantzuna
antolatzeko lanean jarraituko dugu.
Errepresiorik ez! Elkartasuna antolatu!