ELKARRETARATZEA EGINEN DUIRUÑEAN BAZTANGO EH BILDUK JAZARPENA SALATZEKO ETA ELKARTASUNA ADIERAZTEKO DEKLARATUKO DUTEN ORDEZKARIEI

2016ko maiatzaren 2an Palacio de Arozteguia SL.  Enpresak Baztango Ehbilduko ordezkari eta ordezkari ohien aurkako kereila paratu zuen Iruñeko 5. Instrukzio auzitegian.  Joseba Otondo Bikondoa, gaur egun Baztango Alkate eta Baztango Batzar Nagusiko lehendakaria eta 2011tik 2015era Baztango Alkate eta Baztango Batzar Nagusiko lehendakaria izan den Garbiñe Elizegi Narbarteri  prebarikazio delitua egotzi nahi diete. Batean, legez kontrakoa izendatu zen proiektuaren epaiketan Baztango Udala erretiratzeagatik eta bertzean berri bat osoko bilkurara “berandu” eramateagatik.

Baztango EH Bildutik oroitarazi nahi dugu Aroztegiako proiektua proiektu urbanistiko espekulatzailea dela, Baztango paisaia eta egitura soziala hankaz gora jarriko lukeena. 2010ean hasierako Aroztegiako proiektu espekulatzailea herritarren borondatearen kontra onartu zuen Baztango Udalak Virginia Aleman Baztango Udaleko alkate zela (gaur egun Geroa Baiko parlamentaria), UPNren gobernuak azken oniritzia eman arte. Proiektu hura epaitegiek legez kontrakoa izendatu zuten.

2014an Baztango Udaleko eta Baztango Batzar Nagusiak Lekarozko lur ez-urbanizagarrien birkalifikazioaren kontra zeudela ikusirik, UPNren gobernuak proiektua UGPSa bezala tramitatzea onartu zuen. Baztango tokiko entitateen autonomiaren gainetik pasatuz eta UGPS figura inposiziorako erabiliz, hauteskundetako bi egun falta zirela UGPSa onartu zuen.  Geroa Bairen gobernuak berriz, UPNren jokaldiari azken oniritzia eman zion 2015ko urte zahar bezperan.

Nor da hemen prebarikatzailea? Nork onartu ditu legez kontrako birkalifikazioak? Nork  jokatu du txosten teknikoen kontra? EH Bildutik argi utzi nahi dugu zintzotasunez eta gardentasunez jokatu dugula beti, eta kereila hau jazarpen judizial politiko baten kanpaina besterik ez dela.  Mehatxu eta jazarpen guztien gainetik EH Bilduk herritarren borondatearen defentsan, lurraren defentsan eta kapitalismo espekulatzailearen kontra segituko du lanean. Ez gaituzte isilduko eta ez gaituzte geldituko.

Honela,  Baztango alkate eta alkate ohiarekin elkartasuna adieraztera herritarrei dei egiten diegu, Urriaren 6an goizeko 9terdietan Iruñeko Auzitegietan eginen den elkarteratzean parte hartzera.

«BERTSO MARRAZTUAK» EMANALDIA HELDU DEN IGANDEAN

Heldu den igandean, urriaren 2an, Anizko herrietako besten programazioaren barnean BERTSO MARRAZTUAK emanaldia izanen da.

Eskualdean lehenbiziko aldiz eskainiko da emanaldi berezi eta umoretsu hau: Unai Gaztelumendi bertsolari eta karikaturgileak marrazki bidez proposatuko dizkie gaiak bertsolariei, kasu honetan Amets Arzallus eta Unai Iturriagari.

ERNATZEKO DEIA

Baliabide naturalak suntsitzen duen kontsumismoaren gurpil eroaren aurkako animaziozko aldarria.

GAUR GUDARI EGUNA

ANIZKO BESTAK IZANEN DIRA HELDU DEN ASTEBURUAN

Larunbatean gan-torri autobusa ibiliko da herriz herri

SORTUREN BIRFUNDAZIO PROZESUAREN AURKEZPENA LARUNBATEAN

AURTENGO UDAN BAZTANGO UDALAK HERRIETAKO ESKOLETAN HAINBAT LAN EGIN DITU

Lanik aipagarrienak Lekarozko eskolaren berritze eta irekitzea, Gartzaingo eskolaren egokitzapena eta Ikastolako jangelaren handitzea izan dira

Urtero bezala, aurtengo uda sasoian Baztango udalak bere ardurapeko eskoletan lan desberdinak egin ditu. Lan nagusiak Gartzain eta Lekarozko herriko eskoletan eta Baztan Ikastolan egin dira. Gainerakoetan ohiko mantenimendu lanak egin dira: konpoketak, margoketak e.a.

Gartzaingo herriko eskolari buruz eraikina franko zaharturik eta tokiz eskas zegoen. Modu horretan, goitiko solairuan psikomotrizitate gela eta irakasleen gela egin da eta leihoen aldaketa ere bai. Bertzalde, beheitiko solairuan zola eta leihoak aldatu dira. Lan hauek Berdaitz eraikuntza enpresari 57.969 euroan eman zitzaizkion. Aurrekontua Baztango zortzi enpresari galdegin zitzaien. Aipagarria da Nafarroako Gobernuak lan hauetarako ez duela laguntzarik eman, horretako dirulaguntzen deialdiko irizpideak arrazoibide gisa harturik. Hala, inbertsio osoa Baztango udalak egin behar izan du.

Bertzalde, aurtengo udan ere, Lekarozko herriko eskola irekitzeko lanak egin dira. Eskolaren eraikina osorik zahar berritu da: zola, barneko banaketa, leihoak… Inbertsioa Baztango udalaren eta Nafarroako Gobernuaren artean egin da. Denera 75.000 euro kosta da eta Construcciones Arakan enpresak egin du, eskaintza hoberena berea izan baita.

Modu berean, Baztan Ikastolan jangela handitu da. Orain artioko jangela ttiki gelditurik handitzeko lanak egin dira, horretarako tabike bat bota eta zola berritze lanak egin dira. Lan horiek udaleko enplegu babestuko langileek eta mantenimendukoek egin dituzte. Materialean 3.500 euroko inbertsioa egin da.

Aipagarria da, halaber, Oronozko herriko eskolan haurrek jostatzeko parkean egin den zola berritzea. Alde batetik hormigoi geruza eman da eta ondotik, zola beratza paratu da. Lan hauek Bittor Elizagoyen eraikuntzakek eta Mader Playk 6.000 euroan egin dute.




Gainerakoan, bertze eskoletan ohiko mantenimendu lanak egin dira: margoketak, leiho konponketak e.a.

ANIMA ZAITEZ KONPOSTA EGITERA!

BAZTANGO UDALAK ZAHARRETXEKO SUKALDEKO LANAK 16.776 EUROAN EMAN DITU

Elizondoko Francisco Joaquin Iriarte zaharretxeko sukaldearen teilatua konpontzeko lanak Arraiozko Putxiria eraikuntza enpresari  16.776 euroan eman dizkio Baztango udalak. Exekuzioaren hasierako aurrekontua 17.659koa zen, hortaz, aurkeztutako eskaintza ekonomikoen artean hoberena Putxiriarena izanik, udalak lana berari eman dio. 

Euria egitarakoan zaharretxeko sukaldeko teilatutik euria iragazten zen eta barneko aldean hezetasunak sortzen. Horregatik sukaldeko sabai edo tetxoa zartatzen eta porroskatzen ari zen. Modu horretan egin beharreko lana terraza moduko teilatua aldatzea izanen da.  Horretarako lehendabizi geruza iragazgaitza paratuko da eta ondotik gainetik ibiltzeko zola emanen. Sukaldearen barneko sabaiko zartadurak ere luzitu beharko dira. Lanak esleipena egin eta hilabete eta erdiz egin beharko dira.

Bertzalde, Baztango udalak zaharretxeko inbertsio plana egiteko lanak hasi ditu. Txosten horrekin zaharretxean egin beharreko lan guztien memoria bilduko litzateke: etxe barneko berritze eta egokitzapenak, kanpoko aldeko moldaketak, irisgarritasuna, teilatua… Txostenak lanak planifikatzeko eta  dirulaguntzak eskatzeko balioko du.

BAZTANGO UDALAK MENDIETAKO LANAK HASI DITU

Baztango udalak 2016ko aurrekontuetan aurrikusitako mendi-lanak abiatu berri ditu. Excavaciones Javier Alzugarai enpresak 56.617 eurorengatik (BEZ kanpo) mendiko hainbat bide ireki eta konponduko ditu eta Lanalekomek 43.334 eurorengatik (BEZ kanpo) mendi garbiketa lanak eginen.

Mendietako bideei buruz Beartzunen Gamioko bordaren gaineko aldetik, kamioien pasa saihesteko 500 metroko bidea irekiko da. Aritzakunen Zotaleta inguruan pinoak eta izeiak ateratzeko bidea 1,5 km.ko bidea; Almandozen, mendi ustiaketarako 800 metroko pista eta Elbeten, Berro Maldako bidea suetarako sarbidea izateko errepasatuko. Gainera Aritzakunen, Sumutsuko bordaren ondoan eta Gartzainen, Urballo alderat dagoen Gilleneko bordaren inguruan, euriak hondatutako bideetan harri-lubeta edo eskollerak eginen dira.

METAZIRI ALDIZKARIA KARRIKAN!

Bere 20. alea argitaratu du METAZIRI EKOIZPENAK kolektibo editorialak. Ale hontan hauk dira ageri diren gaiak:

• HERRI-LURREN BIDEA Aitor Azkarate Tomassone. Aniz
• MAITE ZAITUZTET ORAINDIK Garbiñe Elizegi Narbarte. Lekaroz
• BAZTANGO TURISMOAREN ERRONKAK Irantzu Pastor Ordoki. Lesaka
• BAZTANGO GARAPENEAN, NIK ZER? Belen Aleman Irigarai. Lekaroz
• HITZEN LAPURRAK Maitane Maritorena Azkarate. Aniz
• UDALEKO NEKAZARITZA ETA ELIKADURA POLITIKAZ Joseba Otondo Bikondoa. Elizondo 
• “DENBORA IZOZTURIK DAKUSATEN ERLOJUAREN SEGUNDOAK” Asier eta Oihana Otxandorena Dorregarai. Elizondo 
• BAZTANGO GAZTE ASANBLADA
• ESKOLETAKO JANGELETAN ZER JAN HALAKO BAZTAN Laura Andresena Zubigarai. Arizkun

Aldizkaria Erratzuko Zubi Punta eta Altxuko dendan, Arizkungo Dolaetxean eta Elizondoko Axularren 3 euroan erosten ahal da.

GAUR BATZARRA

TURISMOKO DATUAK EMAN DITU BAZTANGO UDALAK

Baztango Udala aurreko legealdian hasi zen urtez urteko turismo bulegoko datuak modu sistematikoan jasotzen, eta turistek eskatzen duten  informazio mota hobeto sailkatzen. Horri esker, azken 5 urteetan Purioeseneako bulegotik pasatu direnen profilak eta interesak jasoak ditugu, konparaketa eta analisirako aukera emanez. Udako denboraldia amaitzen ari garela, aurten Elizondoko Turismo Bulegora hurbildutako bisitarien datu eta ezaugarri nagusiak aurkeztu nahi ditugu.

Uztailean 4496 pertsona hurbildu ziren turismo bulegora informazio eske; iaz baino %29,08 eta duela 5 urte hurbildu zirenak bider 3,75. Igoera nabarmena izan da. Jatorriari dagokionez, aurreko urteetako argazki berdintsua dugu: %27 Euskal Herrikoa izan da, %16,73 Kataluniakoa, %10,27 Herrialde Valentziarretakoa; %7,85 Andaluziakoa eta %5,11 Aragoikoa, %6,04 atzerrikoa izanik (horietariko %42  Frantziakoak). Urteko bertze sasoietan Madrilgo jende gehiago jasotzen badugu ere, aipatu beharra dago uztailean kopuru hori ez dela guztizkoaren %2ra iristen.

ALERTA LARANJAZ OHARTARAZI DU BAZTANGO UDALAK

Metereologia zerbitzutik jakinarazi dutenez  eguerdiko 14:00tatik gaueko 21:00tarat ortoskaldi eta erauntsi handien arriskua izanen da Baztanen. Horregatik, alerta laranja eman dute.

Baztango udalak, ugalde bazterrean bizi diren herritarrei edo ondasunak dituztenei erne ibiltzeko ohartarazten die.

BURUILAREN 15ean BATZARRA EGINEN DU BAZTANGO EH BILDUk

BAZTANGO UDALAK ORABIDEA, ZUAZTOI ETA AGERRE ALDEKO BIDEAK BREAZTATZE LANAK EMAN DITU.

Aitzineko astean Baztango Udalak bere eskumenekoak diren hainbat bide breaztatzeko lanak 84.939 euroan (BEZ gabe) “Construcciones Boreste SA” enpresari eman dizkio. 

Bide hauek Baztango auzo eta baserri desberdinetarat doaz eta herritarren guttieneko ongizatea bermatzeko beharrezkoak dira. 

Modu horretan Bagorditik Orabideko bidean 1,5 km.ko tartea breaztatuko da, Azpilkuetako Zuaztoi auzoan, auzoraino gelditzen diren 130m eta Elizondoko Agerrea alderdian 1,8 km. 

Lan hauek egiteko udalaren hasierako aurrekontua 108.300 eurokoa zen (BEZ gabe), lanak emateko egin zen prozedura irekian eskaintza hoberena “Construcciones Boreste, SA”k 84.939 euroan egin zuen eta lanak beretako izan dira. Prozedura ireki honetarat hiru enpresa aurkeztu ziren. 

Lanak iraileko bigarren astean hasiko dira. 

BAZTANGO GEROA BAI UDAL AUTONOMIAREN KONTRA

Baztango EH Bilduk, gaurko Osoko Bilkuran gertatutakoaren harira, prentsa ohar hau kaleratu du:

Gaurko Osoko Bilkuran Geroa Baik, UPN eta Baztango Auzolaneanen babesarekin, azken momentuan sartutako premiazko mozioaren bidez, Baztango Udala, Batzar Nagusiak Aroztegiko PSISaren kontra abiatutako prozesuan erakunde horren kontra judizialki jokatzera behartu du. Alkatetza duen EH Bilduk eta Baztango Ezkerrak aukera horren kontra bozkatu dute. 

Bere garaian Baztango Batzar Nagusiak Nafarroako Gobernuak Aroztegiari buruz onartutako PSISari helegitea aurkeztu zion, bertzeren artean, udalaren hirigintza eskumenak eta autonomia defendatzeko, Aroztegiko herri-lurren desjabetza gelditzeko eta Lekarozko Herriak proiektuaren kontra duen iritzia betearazteko.

Gaurko erabakiarekin Geroa Baik udalaren autonomia urraketa eta eskumen gabetzea babesten du, lekaroztarren eta baztandarren erranari kasurik ez die egiten eta herri lurren lapurketari bidea ematen dio.

Bereziki larria da udal hautetsiak izanik interes partikular batzuei fabore egiteko udal autonomiaren eta konpetentzien kontra egitea. Baztanen etorkizuna guztiz baldintzatzen duen proiektu honen aitzinean, udaleko hautetsiek ez badituzte Baztango erakundeen konpetentziak defendatzen zertarako daude udalean?

Aldi berean, oroitarazi nahi dugu aldaketaren indarren artean Geroa Bai dela proiektua defendatzen duen bakarra. Hala, aldaketaren gobernuaren lehen urtearen balantzea egiten ari den honetan, Aroztegia demokratikoki eta herritarrei entzunez konpontzea funtsezkoa da. Modu horretan bakarrik lortuko da inposaketan eta pelotazo urbanistikoan oinarritu den politika zaharraren aitzinean sinisgarritasuna izatea. Gobernuak ongi aski daki afera konpontzeko legalak diren bertze bideak badirela, gorderik dituen txostenak dioten bezala.

Baztango EH Bilduk bertze behin Aroztegiko  PSISa gelditzeko eta herritarren iritzia errespetatzeko eskatzen du.

SUMUTSUKO BIDEA KONPONTZEKO HELEGITEA PARATUKO DU BAZTANGO UDALAK

Espainiako Gobernuak Sumutsu eta Bidarrai arteko bidea konpontzeko Baztango udalak aurkeztutako 143.745 euroko proiektua ez du onartu. Hala, Baztango udala erabakiarekin ados ez dagoenez helegitea prestatzen ari da.

Proiektua ez onartzeko Madrilgo gobernuak bi argudio eman ditu: laguntzaren helburua konponketa lanak direla, ez lan berriak egitea eta lana ez dela udalaren eskumenekoa, zati bat eremu publiko hidraulikoan baitago. 

Baztango udalak, alegazioetan alde batetik, egiaz den bezala, bide konponketa dela arrazoituko du eta ez lan berria. Bertzetik, Nafarroan maiz, nahiz eremu publiko hidraulikoan egon udalek halako lanak egiten dituztela. Eta hori egiaztatzeko, Baztango udalak Nafarroako Gobernuko ingurugiro departementuari txostena eskatu dio.

2015eko otsailan izandako erauntsiek Sumutsutik Bidarrairako bide zatian lur-mendia egin zuten. Bidea denbora batez hetsirik gelditu zen, behin-behineko pasabidea egin artio. Bidea behin betiko konpontzeko Baztango udalak Espainiako Gobernuak ateratako dirulaguntza deialdi berezirat proiektua aurkeztu zuen. Baztango Udalak, ondoko asteetan, epeen barnean aipatu helegitea aurkeztuko du.

UDALAK BIDEAK MANTENTZEKO TRAKTOREAREN ETA SASIAK MOZTEKO MAKINAREN PLEGUAK ONARTU DITU

Baztango udalak ortziraleko Tokiko Gobernu Batzordean traktore berria eta sasiak mozteko makina edo desbrozadora erosteko pleguak onartu zituen. Erosketa horretarako 60.000 euroko aurrekontua  zehaztu du. Traktorea eta sasiak mozteko makina erostea 2015eko azaroko udalbatzarrean erabaki bazen ere,  2016ko ekaina artio aitzineko urteko kontuak hetsi ez zirenez, aurrekontu aldaketa hori ez da erabiltzeko moduan izan. 

Bertzalde, traktorearen ezaugarri teknikoak zehaztea lan konplexua izan da. Horrek guztiak aipatu traktorearen eta sasiak mozteko makinaren erostea gibeleratu du eta, ondorio bezala, aurtengo udan bide bazterrak ez dira garbitu ahal izan. 

Ortziraleko erabakiaren ondotik erosketa prozesua abiatu da eta, orain, pleguak bertako enpresei eskaintzak egin ditzaten igorri zazikie. Administrazio publikoaren jarduera arautzen duten epeak kontuan harturik, traktorea eta sasiak mozteko makina irailaren hondarra artio ez dira ailegatuko. Behin erosketa bururatuta lanean lehenbailehen paratuko dute.

Baztanek 900 km. inguru bide ditu eta horien mantenimendurako aipatu traktorea eta sasiak mozteko makina inbertsio garrantzitsuak dira. Aurtengo uda modu honetan joan bada ere, urritik abendua artio garbitze lanak egiteko aukera izanen da eta heldu den urtean udaberritik lan betean ibiliko da

AROZTEGIA ETA GERO ZER? PLATAFORMAREN PRENTSA OHARRA UXUE BARKOSEN BISITALDIAREN HARIRA

Uxue Barkos Nafarroako Gobernuko lehendakariak Saharaztan elkarteak Baztanen antolatutako bakelekuetara egindako bisita dela eta Aroztegia…eta gero zer? plataformak hurrengo adierazpenak egin nahi ditu:

-Saharako herriari jasaten duen zapalketa eta eskubide urraketen aitzinean gure elkartasuna eta babesa erakutsi nahi diogu.

-Mundu mailan ematen diren zapalkuntza guztiekin bukatu behar dugu, eta guztion ardura da hori egitea. Tokian tokiko zapalkuntzak borrokatuz hasita, mundu mailan ematen diren zapalketekin elkartasuna adieraziz.

-Guztiz hipokrita eta lotsagabea da aldi berean Lekaroz eta Baztanen erabakitzeko eskubidea ukatzen duen eta herritarren nahiaren kontra jokatzen duen Gobernuaren lehendakaria, gaurko ekitaldi honetan egotea. Ez da onargarria itsasoaren bertze aldean gertatzen diren eskubideen urraketak salatzen duten agintariek hemen bertan, Baztanen, herritarren hitzaren kontra inposaketa erabiltzea.

-Lekarozek zein Baztanek argi eta garbi erran diote ezetz Aroztegiako proiektuari, ezetz espekulazioari eta ezetz ustelkeriari. Baietz erran dioten bezala tokiko garapen iraunkorrari, euskarari eta ingurugiroa zaintzeari.

-Sahararrak bezala borrokan segituko dugu gure etorkizunaren jabe izan arte!

HERRIARENA DA HITZA, HERRIARENA ERABAKIA! AROZTEGIA GELDITU!

LARUNBATEAN KONTZERTUA ORONOZEN

BAZTANGO UDALAK HILTEGIKO PUSKATZE GELA AKITZEKO LANAK ESLEITU DITU

Baztango udalak Loizu udal hiltegiko puskatze gela akitzeko lanak Egallene eraikuntzaki eman dizkio.

Aitzineko legealdian oinarrizko azpiegitura egin ondotik, orain, Nafarroako Gobernuko osasun publikoko departamentuko albaitarien azkeneko eskakizunak betetzeko hainbat lan eginen dira: puskatze gelaren barneko konketa edo lababoa, komunaren berregitea eta ur zikinen bideratzea, aratxeak puskatzeko egituraren egokitzapena, ate isolatzailea paratzea eta tripakiak garbitzeko gela egitea.

Lan hauek 16.200 euroan BEZ barne esleitu edo adjudikatu dira eta lanak azaroaren 30erako egin beharko dira. Urte berriarekin puskatze gela abiarazi nahi luke udalak.

Lan hauek emateko udalak Baztango bortz eraikuntza enpresari eskaintzak egiteko gonbidapena egin zien eta horietan denetan, eskaintza hoberena lanak hartuko dituen Egallene eraikuntzakek egin du.

BIHAR LAXOA FINALA ARRAIOZEN

KARRIKALDIA: BAZTANGO MUSIKARI GAZTEAK KARRIKAN

Baztan arte adierazpide askoren sorburua izan dela eta badela jakina da. Musika alorrean, ez da gutxiagorik gertatzen, eta hori dela eta, Karrikaldia izeneko egitasmo berriarekin Udalak Baztango musikari gazteak bultzatu nahi ditu. Baztango Musika Eskolan hainbat gaztek ikasten dute eta modu honetan bai bertakoei bai bisitariei haien lana erakustarazi nahi zaie.

Informazio gehiago: erran.eus

Egitaraua

Abuztuaren 4a, ortzeguna  Erratzu (Herriko Plaza) 19:00-21:00

1. Olaia Inziarte + Ion Maiordomo
2. Ainara Aginaga + Miren Ballarena
3. Olaia Inziarte + Xabi Gaztelu

Abuztuaren 5ean, ortzirala Amaiur (Herriko Plaza)

1. Olaia Inziarte + Ion Maiordomo
2. Enara Arregi
3. Olaia Inziarte + Xabi Gaztelu

Abuztuaren 6an, larunbata Elizondo (Ciga margolariaren Plaza)

1. Ainara Aginaga+ Miren Ballarena
2. Olaia Inziarte + Ion Maiordomo
3. Enara Arregi
4. Olaia Inziarte+ Xabi Gaztelu

PLAZARA DANTZARAK EKINTZA SEXISTAK BAZTERTZERAT KONBIDATU DU

Baztandarren Biltzarra egunean, herriko plaza publiko desberdinetan  bazterketarik gabeko Mutildantza parekideaz gozatzen ari ginen momentu berean,  gizon talde batek  elizak herritarrei kendutako lurretan  indarkeria sexista bultzatu zuen,  emakumeak bigarren mailakoak garela idurikatuz.

Plazara Dantzaratik gogor salatu nahi dugu ekintza sexista hau. Nekez lortuko dugu emakumearen aurkako indarkeriarekin bukatzea, gure egunerokoan emakumearen bazterketa eta mespretxua indartzen dituzten jarrerak bultzatzen diren bitartean. Emakumearen kontrako indarkeria ezabatzeko ardura guztiona da.

Honengatik, Plazara Dantzarak Elizondoko bestetan herritar guztiak plaza publikoan dantzatzera gonbidatzen zaituztegu, bazterketarik eta erasorik  gabe dantzatzeko aukera bakarra hori baita.