2014/10/30

ERRIGORA MARTXAN DA!! EGIN ZURE ESKAERA


Nafar hegoaldeko uzta euskarari puzka leloarekin aurten ere Nafarroako hegoaldean nekazaritzak eta euskarak bizi duten egoerari bulkaldi bat emanten saiatuko dira. 
50 euroren truke (merkatuko prezio berean) Nafar produktuez osatutako saski ederra eskuratzeko aukera dago. Diru horren %25 Nafar hegoaldeko ondorengo hiru proiektuetara joanen da: 
  • Erriberako ikastolak
  • Euskaraz bizi eta ikasiko Hamarratz proiektua
  • Erriberako AEK 
Urriaren 27tik azaroaren 12ra eskaera egiteko aukera dago Baztanen toki hauetan: Zubi Punta, Dolaetxea, Fantxike, Intza eta Kattalingorri. gero SUINKI euskaltegian biltzen ahalko dira azaroaren 17tik 30era 50€ pagatuz.

2014/10/29

“KONPOST EROAK” ANTZEZLAN ARRAKASTATSUA IRURITAN

Joan den igandean Iruritako Gizarte Bilgunera hurbildutakoek Baztango Udaleko Kultura eta Hondakin sailek antolaturiko antzezlana ikusteko aukera izan zuten. Konfuso, Plastik andereñoa eta Karton jaunaren eskutik arratsalde bikaina pasatzeko aukera izan zen. Hondakinak bereizten ez dakien baina ikasteko izugarrizko ilusioa daukan kale garbitzaileak, bi pertsona oso ezberdinekin egin zuen topo Iruritan. 
Hondakinak bereizten eta berrerabiltzen erakutsi zieten bertaratutakoei, zirko, antzerki, musika eta irrifar pila batez lagundurik. Saioa bikaina izan zen!

2014/10/28

BAZTANGO ERREKETATIK PENDULORAT KAYAK BATEAN


Baztango gazte batzuk grabatuak, irudi ikusgarriekin batean elkartasuna adierazi nahi izan diete 28 gazte auzipetuei.

2014/10/27

IDAZLEEKIN SOLASEAN EKIMENAK ITZULPENGINTZA IZANEN DU MINTZAGAI

Heldu den astean bilduko da aurtengo lehendabiziko aldiz Idazleekin solasean ekimena. 
Xabier Olarra izanen da bertan Alaa Al Aswaniren Jakobian Eraikina liburuari buruz solasteko. Bera da Arantzazu Royorekin batean liburu horren itzultzailea.
NOIZ: Azaroaren 3a, astelehena, 19:00etan
NON: Arizkungo Elkartean

2014/10/26

LAU GURPILEAN IBILI BEHARREAN, BITAN


Zergatik gomendatzen dudan? Poltsikorako, ingurumenerako eta osasunerako ona delako. Antton Zubiak hiru arrazoi horiek eman ditu lanera bizikletan joateak dituen abantailaz galdetzen diotenean. Giouzkoako Foru Aldundiak lanera bizikletan kanpaina hasi du Debagoeiena eskualdean. Ikusi berria

2014/10/25

DROGEN KONTSUMOAREN GAINEKO GURASO ESKOLAK



Saioak adin desberdinetako haur-gazteen gurasoei zuzenduriko hitzaldi parte hartzaileak izanen dira, prebentzioa tiki-ttikitatik lantzen den jarrera arduratsua delako.
  • NOIZ: urriaren 28an eta azaroaren 4, 11 eta 13an, 17:00etatik 19:00etara. 
  • NON: Arizkunenean
Lehen hiru saioak Hegoak Elkarteak eta azkena ANASAPSek emanen dituzte.

Hegoak elkartea droga kontsumoaren prebentzioan lan egiten duen taldea da; ANASAPS, ordea, buru osasunaren arloan norbanako nahiz talde mailako egoerei aurre egiten dien elkartea da.

Ez da beharrezkoa aitzinetik izena ematea. Informazio gehiagorako: 948 580006.

EH BILDUREN 13. ALDIZKARIA

2014/10/24

EUSKARA BATZORDEAREN AZKEN AKTA

Azken udal euskara batzordean gai hauek izan zituzten mahai gainean:
  1. Aitzineko Euskara batzordearen akta onartzea, hala badagokio.
  2. Baztango Udaleko Euskararen Erabilera Normalizatzeko Plana, UEMAk prestatua. 
  3. Kirol arloan haur-gaztetxoen euskararen erabilera sustatzeko ekimena. 
  4. Osasun arloan euskararen erabilera bermatzeko ekimenen egoera. 
  5. Udalak Kontseiluarekin sinatzeko asmoa duen lankidetza hitzarmena. 
  6. Udalak AEKren Suinki euskaltegiarekin sinatzeko asmoa duen lankidetza hitzarmena. 
  7. Iruritako historia soziolinguistiko hurbila aztertzen duen ikerlanaren argitalpena eta aurkezpena. 
  8. Mariano Izeta sortu zeneko mendeurrenaren ospatzea eta Dirua galgarri eleberriaren berrargitalpena. 
  9. Abenduko Udal agendarako proposamenak pentsatzeko deia. 
  10. Galde-eskeak eta nork lekarkeena.
Akta osoa hemen

BAZTANGO SAGARDOA GOZATZEN IKASTEKO DASTAKETA-SAIOA EGIN ZUTEN ATZO


Bart atsean Jo ala Jok antolatutako sagardo dastaketa ikastaroa egin zen Elizondoko Aise elkartean. Juan Zubiarran eta Domingo Arina enologoek eta Jakoba Rekondo nekazal ingieniariak Baztango sagardogileek eramandako sagardoen ezagaurrien berri harat hurbildutakoen aitzinean eman zuten. Sagardoaren kolorea, usaina, dastamena - eztitasun edo samintasuna- horiek guztiak eta gehiago aztertu zituzten eta bereziki ezaugarri horien gibelean dauden prozesu kimikoak: dela airearen presentziarengatik, kupelengatik, herdoilarengatik, erabilitako sagar motengatik… Aipagarria da Baztango sagardo ekoizleen sagardoarekin mahai-luzea bete zutela eta hor Arizkungo Gontxeako, Salaberriko eta Gamioxarreako, Erratzuko Idoborroko, Lekarozko Larraldeako, Berroko Larratxeako… eta Berroetako Kikoren, Etxalarko Landaren, Lekarozko Obregozo eta Iturengo Bereauren sagardoak dastatu ahal izan zirena.

ERRIGORA EGITASMOA MARTXAN. BAZTANEN BADA ESKATZEKO AUKERA

Auzolanean antolatzen dituzten saskiak saltzen dituzte eta hango nekazaritzari laguntzeaz gain, euskalgintza bulkatzeko balio du, bildutakoaren %25a harendako delako.
Baztanen urriaren 27tik azaroaren 12ra egiten ahalko dira eskaerak Zubi Puntan, Dolaetxean, Fantxiken, Intzan eta Kattalingorrin. gero SUINKI euskaltegian biltzen ahalko dira azaroaren 17tik 30era 50€ pagatuz.

2014/10/22

KONPOST EROAK ANTZEZLANA IGANDEAN

Baztango Udaleko hondakin eta kultura sailak antolatua Zirika Zirkus taldearen “KONPOST EROAK” saioa ikusteko aukera izanen da igandean. Birziklapena eta konpostaia era ludiko eta dibertigarrian landuko dute.
  • NOIZ: Urriaren 26a, igandea 18:00etan
  • NON: Iruritako gizarte bilgunean

KANPALDIA KUTXABANK BATZARRAREN AITZINEAN


ISILIK GERATU NINTZEN


Bankariak hipoteka ordaindu ezin zutenen bila etorri zirenean,
isilik geratu nintzen,
ni ez baininduten etxetik kanporatu.

Poliziak herri mugimenduak eta ahots kritikoak eraso zituenean,
isilik geratu nintzen,
ni ez nindutelako atxilo eraman.

Politikariek etorkinak jarri zituztenean jomugan,
ez nuen protesta egin,
ni ez nintzelako etorkina.

Enpresariek langileak, gazteak, emakumeak, haurdunak, langabeak… zanpatu zituztenean,
isilik geratu nintzen,
nik lan duina nuelako.

Nire bila etorri zirenean,
ez zen inor geratzen protesta egiteko.





2014/10/21

FERIETAN KONTZERTUAK GAZTETXEAN


BERDINTASUN PLANAREN ZIRRIBORROA AURKEZTUKO DUTE KUARTELKA

Baztango Berdintasun batzordeak Aurkezpen saio parte hartzaileak antolatu ditu lau herrietan, orain arte landutako Planaren zirriborroa ezagutzeaz gain, ekarpenak egiteko aukera izango dute herritarrek.

  • Azaroaren 5a, asteazkena ERRATZUn 19:00etan Lixutegian
  • Azaroaren 10a, astelehena IRURITAn 19:00etan Gizarte Bilgunean
  • Azaroaren 11a, asteartea ELIZONDON 19:30ean Arizkunenean
  • Azaroaren 12a, asteazkena ANIZEN 19:00etan Elkartean

Informazio gehiago hemen

ALDE HEMENDIK!

2014/10/17

KOMUNEN ETA KOMUNALEN INGURUKO MONOGRAFIKOA ARGITARATU DU GALDE ALDIZKARIAK

Galde aldizkari politiko kulturalak "commons"en gaia landu du betze gai aunitzen artean bere azken aldizkarian. Ondasun komunak indibidualismoa eta kontsumismoaren alternatiba gisa aurkezten ditu, begirada eta sektore desberdinetatik aztertuak.

Dosierra irakurtzeko hemen



LIBURUEN AURKEZPEN GURUTZATUA IRURITAKO JAUREGIAN

Pello Salaburu eta Hasier Larretxearen liburuen aurkezpen gurutzatua eginen dute larunbatean Iruritan. Pellok Hasierrena aurkeztuko du, eta Hasierrek Pellorena.
Pello Salabururen Errateko nituenak: Cuzcoko kronika eta Hasier Larretxearen Larremotzetik aurkeztuko dituzte.

  • NON: Iruritako Jauregiako lorategian, 
  • NOIZ: urriaren 18a, larunbatan, 19:00etan.

2014/10/16

81 AMAMA DOKUMENTAL INTERESGARRIA IKUSTEKO AUKERA IZAN ZEN ATZO


Dokumentalaren aurkezpenean abiapuntua azaldu zuen atzo Izaro Glez. Ieregi zuzendariak. Lan taldeak Oteizaren tesia jarraitu du, zeinen arabera gizakiaren historian amatxi-biloben arteko 80 harreman-belaunaldi pasatu diren bakarrik. 81garrena azaldu nahi izan dute dokumental honetan. 
Amatxi-biloben artean transmisioa nola ematen den azaltzeko Euskal Herriko herrialde desberdinetako amatxi eta biloben lekukotasunak biltzen ditu. Beraien baserritik alde egin eta bizitzaren gako izan duten horren gainbehera urtez urte ikusi duten zuzeneko lekukoak dira ageri diren amatxiak.
Dokumentalean bildu dituzte galdera hauen erantzun propio eta kritikoak, ikuspegi zabaletik eta ikuslea protagonista bilakatuz.

BAZTAN MUSIKA ESKOLAN KONTSEILUA SORTU NAHI DUTE

Ortziralean musika eskolak gurasoekin eginen du bilkura.
Batetik zuzendaritzarekin funtzionamenduari buruz arituko dira eta gero udal ordezkariekin. Bertze gauzen artean Eskola kontseilua sortzeko proposamena izanen dute mahai gainean.
  • NOIZ: Urriaren 17a, ortzirala 17:30etan
  • NON: Musika eskolan


ONGIZATEA ESKURA DAITEKE ENERGIA GUTXIAGO ERABILIZ

Berriatik hartua
Alejandro Arizkun NUPko irakasleak hazkunde ekonomikoak xede izateari utzi behar diola dio berrian egindako elkarrizketan, eta lehentasunak bertze nonbait jarri behar direla, «oinarri fisikoen agortzeak» behartuta: «Zoritxarrez, datuek arrazoia ematen digute».
Elkarrizketa osoa hemen